Համալսարանի նոր մասնաշենքի հիմնարկեքի արարողությունը

 2021 թ.  հունիսի 17 -ին, տեղի ունեցավ Ավանդական բժշկության համալսարանի նոր՝ երրորդ մասնաշենքի հիմնարկեքի արարողությունը, որին ներկա էին հիմնադիրները, բուհի աշխատակիցներ, հյուրեր, շինարարներ:

     Արարողությունը սկսվեց համալսարանի հիմնադիրներ՝ ռեկտոր Նորայր Սարիբեկյանի  և դեկան Անահիտ Կարապետյանի  բացման ու շնորհավորանքի խոսքերով:

     Հակիրճ ներկայացվեց կրթօջախի ստեղծման պատմությունը և կարևորելով հիմնարկեքի արարողությունը` մասնավորապես ասվեց.

« Դեռևս 1991 թ., երբ հիմնադրվեց Ավանդական բժշկության համալսարանը,  հիմնադիրների  ամենաբաղձալի երազանքներից  էր սեփական ուսումնական շենք ունենալը: Եվ ռեկտորը ձեռնամուխ եղավ սեփական շենքի  ձեռքբերման   գործընթացին: Հաղթահարելով բազում դժվարություններ՝ նա հասավ հաջողությունների և ԱԲՀ-ն այդ տարիներին միակ  ուսումնական հաստատությունն էր, որի ուսանողները կրթություն էին ստանում նյութատեխնիկական հարուստ բազայով հագեցած սեփական գեղեցիկ շենքի կամարների ներքո:   Բժշկական բուհի համար կարևորելով սեփական  կլինիկա ունենալու   անհրաժեշտությունը, 1997 թ. ստեղծվեց  համալսարանի Գիտաբժշկական կենտրոնը:  Հաջորդ քայլը այդ կենտրոնի համար առանձին մասնաշենքի կառուցումն էր, որը հաջողությամբ պսակվեց  2005   թ-ին:    

          Այսօր արդեն սկսվում է համալսարանի ապագայի հետ կապված հիմնադիրների բազում մտահղացումներից  ևս մեկի   իրականացման առաջին փուլը: Եվ սա միայն սկիզբն է:

     Այս նոր կառույցը իր ժամանակակից,  հարմարավետ պայմաններով ծառայելու է մի քանի նպատակների՝ ուսումնական, կլինիկական, լաբորատոր հետազոտությունների և այլն:

      Նոր մասնաշենքը  կհամալրի    տարիների ընթացքում ստեղծածը,  և   դրանով համալսարանը կունենա  մասնաշենքերի մի գեղեցիկ համալիր, ինչն էլ   կպարտավորեցնի թե՛ համալսարանի  տնօրինությանն ու աշխատակազմին, թե՛ դասախոսներին և ուսանողներին  ջանք չխնայելու` շենքային պայմաններին համապատասխան կրթության մակարդակ ապահովելու համար:

         Արդեն մեկ ամիս է, ինչ համալսարանի գլխավոր մասնաշենքին կից տարածքը վերածվել է շինհրապարակի, շինարարական աշխատանքների եռուզեռ է….

        Հիմնարկեքի հուշաթուղթն ընթերցեց   ԱԲՀ-ի  մարդկային ռեսուրսների և ընդհանուր բաժնի վարիչ, վաստակաշատ աշխատակցուհի Նվարդ Թարջումանյանը:

             «Ամենակալ և բարեհաճ Աստծու կամքով 2021 թվականի հունիսի 17-ին կատարվեց Ավանդական բժշկության համալսարանի  նոր մասնշենքի  հիմնարկեքը: Կառուցումն իրականացվում է Ավանդական բժշկության համալսարանի հիմնադիրներ տեր     Նորայր Սարիբեկյանի և  տիկին  Անահիտ Կարապետյանի  նախաձեռնությամբ ու ջանքերով:

         Աստծու կամքով     կրթօջախը կշարունակի լինել  օրինակելի կրթական հաստատություն, կապահովի կրթության  պատշաճ մակարդակ, նրա շրջանավարտները կշարունակեն համալրել հայրենի և արտասահմանյան առողջապահական համակարգերը:   Կրթօջախը եղել և լինելու է բժշկական կադրերի պատրաստման օրրան՝ ներկայիս և գալիք սերունդների համար:

           Նորակառույց  շինության հիմքին ամրություն ու անսասանություն:

          Հիմնադիրներին կենաց արևշատություն, կրթության բնագավառում հաջողություններ, իսկ հետագայում նրանց  ազգանվեր գործը  շարունակող և զարգացնող   թոռնիկ Վահե Խաչատուրյանին նորանոր ձեռքբերումներ»:

       Հիմնադիրների ստորագրած հուշագիրը դրվեց շինության հիմքում և տրվեց համալսարանի նոր մասնաշենքի շինարարության պաշտոնական մեկնարկը:
            Ներկաները հուզմունքով և ոգևորությամբ իրենց անկեղծ բարեմաղթանքները հղեցին այդ կարևոր նախաձեռնության կապակցությամբ՝ ցանկանալով նորանոր հաջողություններ ու նվաճումներ: